Dayon kamo sa atong kaugalingong tambayan dinhi sa luna sa internet, mga higalang Bisdak!
Magpaila ko sa akong kaugalingon aron kaila mo kinsa ang tagdumala niining Tatak Bisaya, usa ka digital magazine nga mugna alang sa mga Bisaya nga ginama sa mga Bisaya.
Ako diay si Rome Nicolas, usa ka lumad nga Sugboanon nga nagdako sa dakbayan sa Carcar. Nalagpot ko sa dakbayan sa Sugbo aron motungha sa UP Cebu sa kursong BS Computer Science ug karon padayon nga nagpuyo dinhi sa harang dakbayan sa habagatan. Sa pagkakaron, wala pa sa akong plano ang molangyaw sa atong isla tungod buhing saksi ko sa mga paglambo niining atong dakbayan.
Yes, medyo conyo na ko mosulti kon imong pangutan-on akong mga higala. Apan anad ko magsuwat ginamit ang atong pinulongan tungod kay nagdako ko nga tigpadala og mga sugilanon, balak ug mga gumalaysay sa Bisaya Magasin nga gimantala sa Manila Bulletin. Mao kini ang akong gihimong training ground sa pagsulat ug maoy napiling Ang Labing Masaarong Bag-ong Magsusulat sa Bisaya sa Tuig 2010 sa mantalaan. Hala, kinse ka tuig na man diay sukad niadtong higayona!
Ang Akong Pag-Blog og Binisaya
Dili kini ang unang higayon nga nagmugna ko og blog nga alang sa mga Bisaya. Sa tuig 2015, nagmugna kog Basta Bisaya apan wala na kini napadayon tungod kay na-busy na sa kabatan-on ug kutob lang sa plano ang mga gusto nakong buhaton.
Niadtong mga tuiga, miyembro ko sa Cebu Blogging Community nga nahimong Cebu Content Creators hangtod nga wala na gyod ko makahigayon og suwat dinhi sa wanang sa internet. Gikapoy sa pagka-blogger, apan padayon nga nagkat-on og digital marketing.
Ug karon, human sa pila ka tuig nga pagpahuway, ania, mibalik na gyod sa pagsuwat og Binisaya. Apan karon duna na koy mga kauban dinhi sa atong gimugnang digital magazine tungod kay daghan kitang gustong buhaton alang sa Bisdak nga katilingban.
Nganong Namugna ang Tatak Bisaya
Taudtaod na kong nakahunahuna nga sugdan ang ikaduhang higayon nga pagsuway og mugna og blog nga Binisaya. Karon, dili na lang blog apan usa na gyod ka media company nga andam mosangyaw nga kini mugna sa mga Bisaya, alang sa mga Bisaya.
Sa pagkakaron, tungod kay dili na lang ako ang magtabang og mugna niini, dunay mga higayon nga mohangop na kita og Iningles. Dili ra man pinulongan ang nagpaka-Bisaya sa atong pagka-Bisaya, dili ba? Ang atong identity padayon nga nag-evolve sama sa atong lengguwahe apan wala kini nagpasabot nga nakalimot na kita sa atong gigikanan.
For example, pila gyod ka sa mga batan-on karon ang larino mo-Binisaya? Bisan gani ako, saksak-sinagol na ang pinulongan depende sa akong makahinabi. Apan kon pasuwaton na ko, kon tugotan, mogamit gyod ko sa atong pinulongang Binisayang Sinugboanon.
Ug mao na, usahay Binisaya, ug dunay mga higayon nga mag-Iningles ta diri sa Tatak Bisaya. Malipayon ko nga nagkadako ang team aron padayon natong ipasigarbo sa tibuok kalibotan kinsa kita ug unsay atong mabuhat.
Unsay Angay Atangan sa Atong Digital Magazine
Dinhi sa Tatak Bisaya, atong hisgotan ang nagkalain-laing mga kalihokan ug butang nga nanghitabo dinhi sa Visayas ug Mindanao. Pwede pagkaon, mga panghitabo, mga negosyo, ug nagkalain-laing lugar nga angay natong ipasigarbo sa tanan.
Gani kon dunay mga Bisaya nga nasaag na sa Manila ug nagkalain-laing dapit sa kalibotan nga pabiling mapasigarbohon sa ilang pagka-Bisaya, pwede kaayo sila nato i-feature dinhi!
Dili lang ta kutob sa pinulongan. Dili sad ta kutob sa Sugbo, Visayas ug Mindanao.
Kon diin dunay Bisaya, ug sila andam mopaila nga sila mga Bisaya, paningkamotan nato nga maabtan ilang nahimutangan ug kita andam mosaysay sa ilang mga sugilanon.
Dinhi sa Tatak Bisaya, ang tinuod nga bida ang mga may dugong Bisayang dako!